Արդի մոլեկուլային կենսաբանության կարևորագույն ուղղություններից մեկը հանդիսանում է գենային ինժեներիան: Այն առաջացել է 70-ական թվականներին և մեծ զարգացում է ապրում այսօր: Գենային ինժեներիան in vitro ակտիվ ֆունկցիոնալ գենետիկական կառուցվածքների կամ ռեկոմբինանտ ԴՆԹ-ների, այլ կերպ ասած արհեստական գենետիկական տարրերի ստեղծումն է, որը հնարավորություն է տալիս տեղափոխել մի օրգանիզմի գենետիկական ինֆորմացիան մեկ այլ օրգանիզմ: Ընդ որում գեների տեղափոխությունը թույլ է տալիս հաղթահարել անգամ միջտեսակային պատնեշը, փոխանցել առանձին, որոշակի ժառանգական հատկանիշներ մի օրգանիզմից մյուսին: Գենային ինժեներիայի կարևոր նպատակներից մեկը նոր տրանսգեն օրգանիզմի ստեղծումն է:
Գենային ինժեներիայի ամենախոստումնալից ոլորտը հանդիսանում է գենաինժեներային տեխնոլոգիաների կիրառմամբ դեղորայքի արտադրությունը, մասնավորապես, պատվաստանյութերի, հորմոնների արտադրությունը: Պակաս հետաքրքրություն չի առաջացնում նաև սննդային հավելումների արտադրությունը: Գենային ինժեներիան դա ապագայի գիտությունն է: Այս պահին ամբողջ աշխարհում հողերի միլիոնավոր հեկտարներ զբաղեցնում են տրանսգեն բույսերը, ստեղծվում են յուրատիպ բժշկական պրեպարատներ, օգտակար նյութերի նոր պրոդուցենտներ: Ժամանակի հետ գենային ինժեներիան թույլ կտա հասնել նոր նվաճումների բժշկության, գյուղատնտեսության, անասնապահության, ինչպես նաև սննդային արդյունաբերության մեջ:
- Teacher: Gohar Mkrtchyan
- Teacher: Roksana Zakharyan